నీ జ్ఞాపకాలు

నీతో గడిపిన ఆ మధుర క్షణాలు
నను నేనే మరచిన ఎన్నో వైనాలు
మదిని మురిపించిన ఆ తీయని మాటలు
ఎదను మీటిన మరెన్నో భావనలు
నీ తలపులతోనే గడిపిన ఎన్నో రాత్రులు
ఒట్టి ఊహలుగానే ఉండిపొమ్మంటూ
కలవర పెట్టిన ఆ కఠినమైన నిజాలు
మౌనంగా పారాయి నా కంట కన్నీరు
సాక్ష్యం గా నిలిచాయి నా నయనాలు
నిదురకు దూరం చేశాయి నీ జ్ఞాపకాలు!

గుప్పెడంత గుండెలో..

గుప్పెడంత గుండెలో

గూడుకట్టుకున్న ఆశలెన్నిటినో

గుప్పిట్లోనే బిగియించి

మది నిండిన నీ ఆలోచనలను

గది లోపలే బందించి

మరపుకైనా రాని జ్ఞాపకాల్ని

మౌనంగానే భరిస్తూ

ఎదలోపలి భావాలను

వ్యధగానే మిగిలిపొమ్మంటూ

విధి చేసిన శాసనానికి

తలవొగ్గి

గుండె గాయమైనా

బ్రతుకు భారమైనా

పెదాలపై మాత్రం

చిరునవ్వు చెదరనివ్వక

ప్రతి క్షణం నీ తలపులతోనే

చివరి క్షణం కోసం ఎదురు చూస్తూవున్నా!

పరుగాపని వయసు ~ దరిచేరని మనసు!

వసంతాలు దాటేస్తోంది వయసు

వెంట రమ్మంటె రానన్నది మనసు

కాలంతో పాటు పరుగెడుతోంది వయసు

ఆ కాలంతో నిమిత్తం లేదంది మనసు

బ్రతుకు తీరాలు దాటేస్తోంది వయసు

బతిమాలినా వెంటరానన్నది మనసు

దేహాన్ని కరిగించేస్తోంది వయసు

ఇంకా దాహం తీరలేదంటోంది మనసు

బంధాలు తనని ఆపలేవంది వయసు

అనుబంధంతోనే ముడిపడిపోయింది మనసు

మృత్యువు వైపు నడిపిస్తోంది వయసు

గమ్యం చేరలేక విలపిస్తోంది మనసు

రేయనక పగలనక పరుగెడుతోంది వయసు

రేయింబవళ్ళు నీకై ఎదురు చూస్తోంది మనసు

క్షణమాగక పయనిస్తోంది వయసు

నీ ఎద వాకిటనే నిలిచిపోయింది నా మనసు

పరుగాపని వయసు దరిచేరని మనసు!