పరుగాపని వయసు ~ దరిచేరని మనసు!

వసంతాలు దాటేస్తోంది వయసు

వెంట రమ్మంటె రానన్నది మనసు

కాలంతో పాటు పరుగెడుతోంది వయసు

ఆ కాలంతో నిమిత్తం లేదంది మనసు

బ్రతుకు తీరాలు దాటేస్తోంది వయసు

బతిమాలినా వెంటరానన్నది మనసు

దేహాన్ని కరిగించేస్తోంది వయసు

ఇంకా దాహం తీరలేదంటోంది మనసు

బంధాలు తనని ఆపలేవంది వయసు

అనుబంధంతోనే ముడిపడిపోయింది మనసు

మృత్యువు వైపు నడిపిస్తోంది వయసు

గమ్యం చేరలేక విలపిస్తోంది మనసు

రేయనక పగలనక పరుగెడుతోంది వయసు

రేయింబవళ్ళు నీకై ఎదురు చూస్తోంది మనసు

క్షణమాగక పయనిస్తోంది వయసు

నీ ఎద వాకిటనే నిలిచిపోయింది నా మనసు

పరుగాపని వయసు దరిచేరని మనసు!